Экономика департаментінің профессоры Алма Кудебаева (Ph.D.) Қазақстан Республикасы Ғылым және жоғары білім министрлігі тағайындаған «Үздік ғылыми қызметкер – 2025» республикалық сыйлығының лауреаты атанды.
2025 жылы конкурсқа жеті ғылыми бағыт бойынша 358 өтінім қабылданып, нәтижесінде еліміздің әр өңірінен 50 ғалым лауреат атанды.
Алма Кудебаеваның ғылыми зерттеулері субъективті әл-ауқат (subjective well-being), әлеуметтік капитал, кедейлік және әлеуметтік көмек саясатының факторларын талдауға бағытталған. Дина Шариповамен бірлескен зерттеу барысында Орталық Азия елдеріндегі субъективті әл-ауқат динамикасы қарастырылды. Зерттеу нәтижелері 2011–2018 жылдар аралығында Қазақстанда субъективті әл-ауқат деңгейі төмендеп, Қырғызстанда артқанын көрсетті. Сонымен қатар, 2018 жылдан кейінгі деректер Қазақстанда өмірге қанағаттану деңгейінің өскенін айқындады.
Зерттеу субъективті әл-ауқатқа әсер ететін негізгі факторларды анықтады. Олардың қатарында қаржылық қанағаттану, өмірдегі таңдау еркіндігі және әлеуметтік капитал бар. Қазақстан бойынша жүргізілген қосымша талдау субъективті әл-ауқаттың төмендеуі бүкіл халыққа тән болмағанын көрсетті: көрсеткіш қаржылық тұрғыдан қанағаттанбаған топтарда төмендеп, ал қанағаттанған топтарда артқан.
Бұл зерттеу нәтижелері халықтың өмір сапасын арттыруға бағытталған саясатты әзірлеуде маңызды практикалық мәнге ие.
Конкурс нәтижелері туралы толық ақпарат:
https://www.gov.kz/memleket/entities/sci/press/news/details/1135337?lang=ru
Аталған марапат KIMEP University профессор-оқытушылар құрамының жоғары ғылыми әлеуетін және университеттің ұлттық ғылымды дамытудағы үлесін айқындайды.